Италијанскиот Олимписки комитет ја поништи одлуката на Серија А и Италијанската фудбалска федерација со која на Наполи му беше одземен бод затоа што не се појави во Торино на 4 октомври на натпреварот против Јувентус.
Наполи не отпатува во Торино по совет на локалната епидемиолошка служба затоа што двајца играчи на Наполи беа заразени со коронавирус. Неколку дена претходно Наполи играше со Џеноа, натпревар по кој се појавија повеќе од 10 случаи на заразени, па Наполи строго ги следеше упатствата и не отиде во Торино.
Но, Серија А и италијанската федерација заклучија дека Наполи не вложи доволно напор да дојде на натпреварот, па затоа не беше откажан, туку победата му беше доделена на Јувентус (3:0), а Наполи беше казнет со одземање на еден бод.
Наполи се жалеше на одлуката, но жалбата беше одбиена. Поднесе жалба и до Олимпискиот комитет, кој денеска пресуди во негова корист и одлучи дека натпреварот мора да се одигра. На Јувентус ќе му се одземат трите бода, а на Наполи ќе му биде вратен одземениот бод. Датумот на натпреварот ќе биде одреден подоцна.