Руската Управа за цивилно воздухопловство потврди дека Евгениј Пригожин и Дмитриј Уткин загинале во синоќешната авионска несреќа.
„Евгениј Пригожин и командантот на Вагнер, Дмитриј Уткин, беа на летот“, се вели во соопштението.
Сите десет лица во авионот, тројца членови на екипажот и седум патници, загинаа во авионската несреќа во регионот Твер. Основачот на Вагнер се најде на списокот на патници.
Патниците биле: Евгениј Пригожин, Дмитриј Уткин, Сергеј Пропустин, Евгениј Макарјан, Александр Тотмин, Валериј Чекалов и Николај Матусејев. Инаку, Чекалов бил на чело на службата за обезбедување на Вагнер. Членовите на екипажот беа: командантот Алексеј Левшин, копилотот Рустам Каримов и стјуардесата Кристина Распопова.
Смртта на Пригожин беше потврдена и од GREY ZONE, канал на Telegram тесно поврзан со Вагнер.
„Шефот на Вагнер, рускиот херој и вистински патриот Евгениј Викторович Пригожин почина како резултат на постапките на руските предавници. Но, тој ќе биде најдобар дури и во пеколот. Слава на Русија!“ објавија тие.
Рускиот медиум Фонтанка објави дека во авионот што се урнал бил Евгениј Пригожин. Нивниот извор потврди дека во авионот биле и другите команданти на Вагнер. Уште еден авион, кој исто така се поврзува со Пригожин, слета на аеродромот „Остафјево“.