Во последните епизоди на документарната серија на Netflix, што ја прикажува животната приказна на британскиот принц Хари и неговата американска сопруга, Хари обвини дека медиумите ја изложиле Меган на стрес, по што доживеала спонтан абортус, пренесе CNN.
Поради таблоидите, Меган имала и суицидни мисли. Ова тој го вели во последните епизоди од документарната серија, објавени денес.
Четвртата, петтата и шестата епизода од „Harry & Meghan“ ги покрива предизвиците со кои парот се соочил во 2018 година, нивната венчавка, нарушеното ментално здравје на Меган и доживеаниот спонтан абортус во 2020 година. На крајот ја образложуваат и одлуката за заминување од кралското семејство.
Во шестата епизода, Меган дискутира за спонтаниот абортус во јули, 2020 година. Како главни стрес фактори во тоа време ги наведе и преселбата во нивниот нов дом во Санта Барбара, Калифорнија, проблемите со нејзиниот татко и пишувањата и известувањата во медиумите.
„Бев бремена. Не спиев многу. Првото утро кога се разбудив во нашиот нов дом доживеав спонтан абортус“, вели Меган.
„Мислам дека мојата сопруга доживеа абортус поради пишувањата во Daily Mail, изјави Хари.
Во 2019 година весникот објави приватно писмо од Меган испратено до татко ѝ. Подоцна, Меган ја доби судската битка против весникот.
