Полицијата приведе 5 лица кои фрлале со камења и тврди предмети кон собраниската зграда за време на денешниот протест пред Собранието против францускиот предлог.
Протестот почна точно напладне, а сега пред Собранието има помала група на граѓани, но видно е зголемено полициското обезбедување.
– Денеска (14.07.2022) до 16:30 часот приведени се 5 лица кои фрлале со тврди предмети кон објектот на Парламентот на Република Северна Македонија. Приведени се С.Н. (44) од Скопје, Д.К. (41) од Скопје, А.С. (30) од с. Бардовци, М.С. (26) од Скопје и Б.Ц. (29) од с. Долно Коњари, стои во соопштението од Министерството за внатрешни работи од каде дополнуваат дека по документирање на случаите, ќе бидат поднесени соодветни поднесоци.
На протестот учесниците се појавија со транспарентите „Македонци уште се борат за своите правдини“, „Слободна ја сакаме, не сакаме протекторати“, „Стоп за бугаризација“, а дел од нив незадоволството го искажаа преку свирежи и фрлање со јајца, камења и тврди предмети кон Собранието.
