Во специјалната воена операција во Украина ќе учествуваат само професионални војници, објави рускиот претседател Владимир Путин.
Според неговите зборови, во војната нема да учествуваат регрути, ниту ќе бидат повикани војници од резервниот состав.
Во честитка по повод Осми март, претседателот се обрати на роднините на војниците кои сега учествуваат во специјалната воена операција, пренесе агенцијата РИА Новости.
„Сакам да апелирам до мајките, сопругите, сестрите, невестите и девојките на нашите војници и офицери кои сега се борат, кои ја бранат Русија во текот на специјалната воена операција. Разбирам дека сте загрижени за вашите најмили. Може да бидете горди на нив и целата држава се гордее со нив и се грижи заедно со вас. Истакнувам дека војниците кои служат воен рок не се и нема да учествуваат во конфликтот и нема да има дополнителен повик за резервисти“, порача Путин.
Поставените задачи ги решаваат само професионални војници, нагласи тој и додаде дека е сигурен дека тие ќе обезбедат мир и сигурност за рускиот народ.
Путин им се заблагодари и на жените кои служат во оружените воени сили на Руската Федерација.
„Посебни зборови со почит за жените кои ја вршат нивната должност, служат во редовите на оружените воени сили на Русија. Ви благодарам за лојалноста кон татковината“, изјави тој.
