Најновите извештаи за терористичкиот напад во Манчестер по концертот на поп ѕвездата Аријана Гранде велат дека се убиени 22 лица, а над 50 се повредени. Меѓу настраданите има и деца.
Експлозијата одекнала синоќа околу 22:30 часот само неколку минути откако американската ѕвезда ја напуштила сцената.
Шефот на манчестерската полиција Јан Хопкинс утрово изјавил дека напаѓачот кој ја активирал бомбата, исто така загинал и дека тој сам го извел нападот, пренесува Guardian.
Се претпоставува дека тој „носел импровизирана експлозивна направа“ и дека истрага ќе утврди дали тој бил дел од некоја терористичка мрежа.
Британските медиуми наведуваат дека досега никој не ја презел одговорноста за нападот, но дека истиот можеби бил најавен преку социјалните мрежи.
Очевидци велат дека експлозијата одекнала додека луѓето ја напуштале „Манчестер арена“ по што настанал вистински хаос.
„Беше тоа голема експлозија, можевте да ја почувствувате во коските. Беше хаотично. Сите трчаа и врескаа и единствена цел им беше да излезат надвор“, изјавија за агенцијата Reuters, Кетрин Мекфарлајн.
Британските политички партии се согласиле да ги прекинат предизборните кампањи воочи изборите кои треба да се одржат на 8.јуни.
Премиерката на Велика Британија, Тереза Меј, изјавила дека властите работат на утврдување на деталите за експлозијата која се смета за „терористички напад“.
Доколку ова се потврди тогаш се работи за најсмртоносен терористички напад на територијата на Велика Британија од јули 2005 година кога четворица британски муслимани убија 52 лица во бомбашките напади во лондонското метро.
Премиерката Меј во 9 часот ќе одржи итен состанок со владата и преставниците на специјалните и антитерористичките единици.
