Русија на изложба во Москва претстави прототип на новиот Sukhoi воен авион од петтата генерација за кој е најавено дека за првпат ќе полета во 2023 година. Првата серија би требало да биде произведена во 2026 година.
„Воениот авион веројатно ќе стане ривал на американскиот „невидлив“ ловец F-35“, изјави Олег Пантелеев, шеф на аналитичката служба на агенцијата Aviaport, пренесе Reuters.
Се очекува новиот руски авион да полета во 2023 година, а првата серија би требало да биде произведена во 2026 година. Aвионот ќе биде тежок за детектирање и ќе има ниски оперативни трошоци.
Во краткото промотивно видео на проектот наречен Checkmate учествуваа пилоти од ОАЕ, Индија, Виетнам и Аргентина, па се претпоставува дека Москва новиот авион ќе го претстави и на странски пазари.
И рускиот претседател Владимир Путин присуствуваше на настанот и го разгледа прототипот на авионот.
