Највисоките руски безбедносни и одбранбени функционери го обвинуваат Западот за поттикнување на нова Студена војна.
Како што пренесуваат светските медиуми, рускиот министер за одбрана, Сергеј Шојгу, истакнува дека НАТО ја користи „непостоечката руска закана за да си го засили својот воен потенцијал“ и да ги зголеми своите сили во близина на границите со Русија.
Односите помеѓу Русија и Западот паднаа на најниско можно ниво од периодот на Студената војна, откако Русија го анектираше Крим и ги поддржа проруските сепаратисти во источна Украина.
Сепак, тензиите ескалираа овој месец, откако поранешниот контрашпион Сергеј Скрипал и неговата ќерка Јулија беа пронајдена без свест во Солсбери на 4 март.
Веднаш по тој инцидент, Велика Британија излезе со соопштение дека тие се отруени со нервен отров и за тоа ја обвинија Русија, која ги отфрли сите обвиненија, што понатаму доведе до масовно протерување на дипломати меѓу Западот и Русија.
Директорот на руската Надворешна известувачка служба, Сергеј Наришкин, денеска изјави дека врз основа на акциите кои против Русија ги презема Вашинготон, веќе е возможно да се зборува околу враќање на ерата во Студената војна.
„Вашингтон стана опседнат во борбата против нешто непостоечко, односно таканаречените руски закани, кои јас не ги гледам. Ова достигна такви размери и доби толку апсурдни карактеристики, што веќе дури е возможно да се зборува и за враќање во мрачниот период на Студената војна“, изјави Наришкин во своето обраќање на безбедносната конференција во Москва.
Некогашниот двоен руски агент, полковник на Руската воена известувачка служба, Сергеј Скрипал и неговата ќерка Јулија, беа отруени со нервен гас на 4 март во британскиот град Солсбери.
Тие се префрлени во болница и од тогаш се во критична состојба.
Викторија Скрипал, внука на Сергеј Скрипал, изјави дека шансите за преживување на Сергеј и Јулија се многу мали.