Зимско невреме ги погоди САД, поради што бизнисите и училиштата се затворени низ Јужна и Северна Дакота, Минесота и Висконсин поради снежни виулици. Речиси 5.000 американски летови се откажани денеска, јавува BBC.
Додека околу 75 милиони луѓе во 29 држави се под предупредување за зимско време, се предвидува дека делови од источниот дел на САД ќе доживеат рекордно високи температури.
Метеоролозите предвидуваат силни налети на ветер чија брзина ќе достигне 80 км/час, додека поради студениот ветер во некои делови на САД температурите би можеле да паднат и до -45 степени Целзиусови.
Во северните држави, прогнозите до половина метар снег во некои делови може да значат дека областите ќе ги издржат најобилните снежни врнежи во последните 30 години. Гувернерот на Минесота, Тим Волц, рече дека Националната гарда ќе биде при рака да им помогне на возачите заглавени во снежната бура.
„Ова е потсетник да останете дома и да го ограничите патувањето ако е можно“, предупреди утрово Одделот за транспорт на Јута. Метеоролозите рекоа дека бурата може да создаде леден појас долг 1.200 милји (2.092 километри), од Небраска до Њу Хемпшир.
Во Лос Анџелес, Калифорнија, каде што е нормално сончево и топло, ќе врне снег, а во планините и во подножјето на Вентура ќе дува силен ветер.
„Цела Калифорнија може да види снег подоцна оваа недела“, напиша на Twitter Дејвид Свејн, климатолог од Универзитетот во Калифорнија-Лос Анџелес.
За разлика од западниот дел на земјата, во делови од источниот дел на САД ќе има високи температури. Температурите во Орландо, Флорида би можеле да достигнат 32 степени Целзиусови, а во Луизијана, Њу Орлеанс до 29 степени.
„Го гледавме овој модел цела зима, каде што западниот дел на САД има потпросечни температури, а источниот дел на САД има надпросечни температури“, изјави за BBC климатологот Ендрју Круцкиевич од Универзитетот Колумбија.
Големи делови од Канада се под временски предупредувања, вклучително и Торонто. Таму се очекуваат од 10 до 15 сантиметри снег и замрзнат дожд.
Иако Канада штотуку имаше рекордно висока температура за февруари, делови од Торонто може да забележат значителна акумулација на мраз.
Во делови од Алберта се во сила предупредувањата за екстремен студ, а во некои региони температурите ќе паднат до минус 40 степени Целзиусови.