Американската администрација утврди дека престолонаследникот на Саудиска Арабија, Мохамед бин Салман, има правен имунитет од тужбата покрената против него за убиството на саудискиот новинар Џамал Кашоги во 2018 година.
Американското Министерство за правда, во документ доставен до Окружниот суд Колумбија, напиша дека доктрината за имунитет на шефовите на држави се заснова на обичајното меѓународно право, така што обвинетиот бин Салман, како шеф на странска држава, ужива имунитет од јурисдикцијата на американските судови.
Кашоги беше убиен и распарчен од саудиски агенти во саудискиот конзулат во Истанбул во операција за која американските разузнавачи веруваа дека е нарачана од принцот Мохамед, кој е „де факто“ владетел на кралството веќе неколку години, пишува Reuters.
Принцот негираше дека го наредил убиството на Кашоги, но подоцна рече дека ја презел одговорноста бидејќи тоа „се случило под негов надзор“.
За време на неговата посета на Саудиска Арабија во јули, американскиот претседател Џо Бајден му кажа на принцот дека го смета за одговорен за убиството на Кашоги.
Кашоги ја критикуваше политиката на престолонаследникот во неговите колумни во Washington Post. Тој отпатувал во конзулатот на Саудиска Арабија во Истанбул за да ги добие потребните документи за да се ожени за Хатиџе Џенгиз, турска државјанка, пренесува Reuters.
Ченгиз ја осуди веста на Twitter, велејќи дека „Џамал денеска повторно умре“.
„Мислевме дека можеби светлината на правдата може да дојде од САД, но повторно парите беа на прво место“, додаде таа.