Ноќеска во јужноамериканскиот пандан на Лигата на шампионите сензација приреди боливискиот шампион елиминирајќи бразилски тим, а аргентинскиот гигант доживеа разочарувачка елиминација.
Со оглед на тоа што на првиот натпревар во Боливија славеше со 3:1, Боливар во Куритиба отпатува со солидна предност. Сепак, домашниот тим на Атлечику Паранаенсе до 67. минута успеа да поведе со 2:0 со головите на Фернанџињу од пенал во 31. минута и на Витор Роке. До крајот не успеа да постигне трет гол па според правилата натпреварот веднаш отиде во пенал-рулет.
Боливијците ги реализираа сите пет удари, прецизни беа и Бразилците сѐ до петата серија кога промаши Чиагу Елену.
Боливар сега во четвртфиналето го чека нов бразилски тим, и тоа Интернасионал, кој ноќеска го исфрли аргентинскиот гигант Ривер Плејт.
Ривер во Порто Алегре замина со предност од 2:1 остварена во Буенос Аирес, но загуби со истиот резултат. Натпреварот немаше голови сѐ до последните 20 минути. Прво Габриел Меркадо, Аргентинец и поранешен играч токму на Ривер, погоди за 1:0 во 70. минута, а осум минути подоцна Алан Патрик го дуплираше водството.
Ривер беше пред елиминација кога во последната минута Парагваецот Роберт Рохас намали на 2:1 израмнувајќи го вкупниот резултат на 3:3 и носејќи го натпреварот во пенал-рулет.
И тука изведувачите беа многу прецизни. Во основната серија сите пет играчи на двата тима погодија. Во седмата серија Пабло Солари промаши за Ривер, но веднаш по него за Атлечику промаши Карлос де Пења. Победникот беше решен дури во 10-тата серија кога играчот кој беше виновен за пеналите, Рохас, го промаши својот удар, а потоа Серхио Рочет ги однесе Бразилците во четвртфинале.
Во третиот натпревар игран ноќеска повторно бразилски тим излезе како победник во бразилско-аргентинска пресметка. Флуминенсе со 2:0 го совлада Архентинос Жуниорс и со вкупни 3:1 отиде во четвртфиналето каде ќе го чека победникот од дуелот на Фламенгу со парагвајска Олимпија.
Вечер после полноќ од 2 часот играат Бока Жуниорс (Аргентина) - Насионал (Уругвај) и Индепендиенте дел Ваље (Еквадор) - Перејра (Колумбија), а од 2:30 е бразилската пресметка Палмејрас - Атлечику Минејру.
