Последниот кум на сицилијанската мафија, Матео Месина Денаро, кој беше уапсен во јануари по триесет години поминати во бегство, е во неповратна кома во болница, а лекарите одлучиле да престанат да го хранат, објавија денеска италијанските медиуми.
Месина Денаро има 61 година, но веќе неколку години боледува од рак на дебелото црево. Токму неговата одлука да започне лекување резултираше со негово апсење по посетата на клиниката во главниот град на Сицилија, Палермо.
По апсењето, Денаро шест пати по ред беше осуден на доживотен затвор и затворен во затвор со максимална безбедност во Аквила, каде според достапните информации продолжил со лекувањето.
Здравствената состојба на мафијашот, кој беше хоспитализиран на почетокот на август, се влоши последните денови и сега е во „неповратна кома“, пишуваат италијанските медиуми.
Лекарите се согласиле дека здравствената состојба на пациентот е таква што треба да се спречи да се храни, а самиот Денаро претходно побарал да не се реанимира.
Познат по прекарот Дијаболик, име на криминалец и протагонист на познатиот италијански стрип чиј обожавател и самиот, Матео Месина Денаро беше долгогодишен шеф на Коза ностра во западната сицилијанска провинција Трапани, иако неговата моќ се прошируваше на Палермо.
Тој беше безмилосен убиец и последен претставник на старата гарда на Коза ностра.
Во 1992 година, тој беше дел од група мафијаши испратени од тогашниот мафијашки бос Салваторе Риина (1930 - 2017) во Рим за да го убие судијата Џовани Фалконе, познат борец против мафијата. Тоа им успеа во бомбашки напад на 23 мај во близина на Палермо.
Матео Месина Денаро исчезна во летото 1993 година и стана најбараната личност во Италија. Во годините што следеа интензивно се трагаше по него.
На крајот било утврдено дека тој престојувал недалеку од родниот град Кастелветрано во западна Сицилија. По долгогодишно прислушување на членовите на неговото семејство и пријателите, полицијата конечно го пронајде Денаро и го уапси во приватна клиника во Палермо, каде дошол на редовен лекарски преглед.
