Врховниот суд на денешната општа седница ги отфрли сите 17 приговори од судиите за годишниот распоред на судии. Меѓу седумнаесетте судии кои поднесоа приговори за годишниот распоред се екс-претседателката на Врховен, Лидија Неделкова, потоа Диана Груевска Илиевска – судијката за „Поткуп“ и случајот Бучковски, Весна Димишкова – судијката која издаде налог за претрес на СЈО во УБК, потоа Ѓоко Ристов, Љубинка Башеска, Славица Андреевска, Добрила Кацарска, Седат Реџепагиќ, Александар Милошески и други.
Инаку, претседателот на Кривичен Стојанче Рибарев, за своја заменичка ја именува Славјанка Јанковска, која за три месеци ќе замине во пензија, а која донесе решенија дека разговорите од бомбите не се докази.
Предмети по нов ЗКП ќе судат: Моника Бахчовановска, која доаѓа од прекршоци, а ќе води и Кривичен совет е сопруга на Владимир Бахчовановски, партиски кадар на ВМРО ДПМНЕ и директор во повеќе јавни претпријатија.
На овој список се и Софија Лаличиќ споменувана во „бомбите“ која исто така ќе одлучува во Кривичен совет, како и Џенета Бектовиќ, Биљана Коцевска, Верка Костова Спасеска, Милка Васовска Ангеловска, Марин Станески, Весна Петровска Тагасовска, Даниела Алексоска Стојановска, Душан Јосифов и двете изненадувања или „деградирање“ на судијките кои до сега судеа организиран криминал: Дијана Груевска Илиевска и Љубинка Башевска. Башевска го судеше „Пуч“, а Груевска: „Ликвидација“, „Шпион“, „Тенковски делови“ и други предмети.
Рибарев го назначи поранешниот претседател на Основниот суд 1, Владимир Панчевски за шеф на целиот оддел за организиран криминал, претходна постапка, судења, а ќе го води и Кривичниот совет. Во распоредот не пишува кој Совет ќе одлучува кога Панчевски како судија на претходна постапка ќе одбие барање и по жалба ќе се одлучува во негов предмет.
Според новиот распоред, во организиран криминал, без судиите Диана Груевска и Ѓоко Ристов остануваат 6 судии, а како нови, покрај доскорешната вд судијка Татјана Михајлова ќе суди и судијката Лидија Петровска, која го судеше „Насилство во Центар“, а во исто време ќе биде и во кривичен совет и како судија за судска пракса.
