Кандидатката за претседател на Франција, Марин Ле Пен денеска при посета на Бретања беше гаѓана со јајца.
По пристигнувањето на Ле Пен на влезот на транспортно претпријатие педесетина противници почнаа да скандираат „Фашисти надвор” и „Мадам, нема што тука да правите“. Додека таа излегуваше од автомобил тие фрлаа јајца кон лидерката на „Националниот фронт”. Поради ова лицата од обезбедувањето веднаш ја внесоа Ле Пен во зградата.
Тоа се случи еден ден по телевизиската дебата меѓу Марин Ле Пен и противникот Емануел Макрон. Коментатори дебатата ја нарекоа „исклучително вербален судир”, забележува АФП.
Според нив Макрон останува фаворит, бидејќи во анкетите на јавното мислење во вториот круг ќе добие околу 60 отсто од гласовите.
Во првиот круг од претседателските избори одржан на 23 април Макрон доби 29,05 отсто од гласовите во Бретања, додека за Ле Пен, таму гласаа 15,33 отсто.