Турскиот претседател Реџеп Тајип Ердоган денеска разговараше со американскиот претседател Џо Бајден, со кого учествуваат на самитот на Г20 на островот Бали во Индонезија.
Во соопштението на Дирекцијата за комуникации на турското претседателство се вели дека на средбата Бајден изјавил дека Турција е важен фактор на патот кон приемот на Шведска во НАТО.
Американскиот претседател го увери Ердоган дека неговата администрација продолжува да ја поддржува испораката на борбени авиони F-16 на Турција.
Двајцата лидери разговараа за широк спектар на прашања кои влијаат на билатералните односи, вклучително и во областа на трговијата и безбедноста. Бајден му се заблагодари на Ердоган за придонесот на Турција за отстранување на проблемите пред договорот за извоз на жито од Украина и обновување на понудата на земјоделски производи. Американскиот претседател изрази сочувство и во врска со терористичкиот напад во центарот на Истанбул во неделата.
Турскиот претседател за време на самитот на Г20 се сретна и со кинескиот претседател Си Ѓинпинг, индискиот премиер Нарендра Моди, францускиот претседател Емануел Макрон, новата италијанска премиерка Џорџа Мелони, претседателот на Обединетите Арапски Емирати Мохамед бин Зајед Ал Нахјан и со саудискиот престолонаследник Мохамед бин Салман.