Ѕвездите од „Враќање во иднината“ (Back to the Future) Мајкл Џеј Фокс и Кристофер Лојд се сретнаа викендов на Comic Con во Њујорк.
Дури и 37 години подоцна, откако беше објавена научно-фантастичната трилогија на режисерот Роберт Земекис, актерите учествуваа на еден од панелите, зборувајќи за нивното пријателство, кариера и снимањето на легендарната филмска сага.
„Најдобриот дел од овој филм беше работата со Крис. Тој е едноставно брилијантен“, изјави емотивниот Мајкл.
Мајкл Џеј Фокс меѓу другото зборуваше и за болеста од која боледува повеќе од 30 години.
Да потсетиме, на 29 години, кога неговата професионална кариера беше на врвот, му беше дијагностицирана Паркинсонова болест. И покрај тешкотиите со одењето и стоењето, актерот на крајот го прегрна својот филмски колега, а публиката тој особено емотивен момент го поздрави со овации.
Видеото од овој трогателен момент расплака многумина.
„Мајкл е толку храбар“, „Не можам да престанам да плачам“, „Толку е тешко да го гледам Марти во оваа состојба“, се дел од коментарите на фановите.