Изгледа како уште да не ја напуштил фабриката за автомобили Zastava и како да не поминале 44 години откако бил произведен.
Станува збор за примерок на легендарната Застава 101, „Стокец“ или „Стојадин“, кој се продава во Нови Сад.
Сепак, ова не е обичен примерок на автомобилот чиј рок на траење одамна е истечен (чест на исклучоци), туку е музејско дело и секако еден од симболите на стара Југославија.
Сопственикот на автомобилот во огласот наведува дека автомобилот бил сочуван и гаражиран уште од далечната 1980 година, односно од денот кога ја напуштил фабриката.
Тој додаде и дека огласениот, сега веќе олдтајмер, никогаш не бил регистриран, а со тоа и никогаш не бил во сообраќај.
Интересен детаљ кој сведочи за совршената и недопрена состојба на автомобилот се навлаките на седиштата кои сè уште се на своето место.
Она што предизвика лавина коментари е токму цената, која сопственикот јасно ја истакна.
„Во музејска состојба е, а цената од 10.000 евра е фиксна“, се вели во огласот.
„Имам 20 евра, ако тоа ти значи нешто. Прати сметка, не вреди ништо ни механички, ни каросериски, ни тогаш не беа нешто. Само сентиментална вредност, автомобилот не вреди за тие пари“, мудруваа некои корисници веднаш под огласот, но имаше и такви кои би сакале да бидат сопственици на ваква реткост.
„Некој сака бубрег? Го давам за 9.000 евра“, напишал еден корисник на социјалната мрежа X (Twitter).
Што мислите, дали овој автомобил вреди 10.000 евра?
