Сурфер од Калифорнија е тешко повреден во напад од голема бела ајкула, еден месец откако научниците заклучија дека бројот на предатори расте во тој регион.
Триесет и петгодишен маж успеа да доплива до брегот на плажа во близина на Сан Франциско, каде луѓето веднаш му притрчаа на помош. По пристигнувањето на спасувачките служби човекот бил префрлен во трауматолошката единица на општата болница Закерберг во Сан Франциско.
Ајкулата што го нападнала, според процените, била долга меѓу 180 и 250 сантиметри, соопшти шерифот на округот Сан Матео, укажувајќи дека веројатно станува збор за младо животно.
Се работи само за еден угриз, сурферот имал 10 рани на задниот дел на десното бедро, вели Брајан Хам, началник на пожарната единица на заливот Сан Матео.
„Ајкулите обично се наоѓаат внатре во зоната за сурфање, така што знаат да дојдат и во подрачје на 30 до 60 метри од плажата. Плитка е, но ајкулата може да нападне многу блиску до брегот“, објаснува тој.
Минатиот месец морски еколози од Државниот универзитет во Монтана открија голем број ајкули во таканаречениот црвен триаголник во северна Калифорнија, којшто минува северно од заливот Монтереј до заливот Бодега и околу 32 километри од брегот до островот Фаралон.