Светската здравствена организација (СЗО) денеска соопшти дека бројот на смртни случаи во Европа минатата недела се зголеми за 5% и дека Европа е единствениот регион во светот со зголемување на смртните случаи од COVID-19.
СЗО додаде дека бројот на потврдени случаи на инфекцијата на глобално ниво е зголемен за 6%. Од 3,3 милиони нови случаи – 2,1 милион се регистрирани во Европа. Ова е седма недела по ред како расте бројот на нови случаи на инфекција со COVID-19 во 61 земја од европскиот регион, што се протега од Русија до Централна Азија.
СЗО вчера соопшти дека бројот на смртни случаи од коронавирус секаде во светот е стабилен или во опаѓање, освен во Европа. Оттаму додаваат, пренесуваат американските медиуми, дека бројот на нови инфекции во Африка, Блискиот Исток и Југоисточна Азија од јули е во опаѓање.
Во Европа, најголем број нови случаи е забележан во Русија, Германија и Обединетото Кралство.
СЗО забележува дека смртноста од COVID-19 во Норвешка е зголемена за 67%, додека во Словачка за 38%.