Бангкок, 8 јули 2018 (МИА) - Започна операцијата за спасување на 12-те деца и нивниот тренер кои се заглавени во пештера во Тајланд.
Локалниот кризен центар соопшти дека операцијата ќе трае две до три дена.
- Тие ќе бидат извлекувани еден по еден и тоа ќе трае два до три дена, наведе еден од раководителите на кризниот центар.
Децата, на возраст од 11 до 16 години, кои биле сместени во еден фудбалски камп, и нивниот тренер заминале на разгледување на пештерата на 23 јуни, меѓутоа обилните монсунски дождови предизвикаа поплавување на пештерата и тие останаа заглавени во неа.
На еден искусен нуркач за пристап до местото на кое се наоѓаат децата и враќање назад, му се потребни 11 часа. Рутата е долга неколку километри и минува низ матна застоена вода, тесни канали, скали и други препреки. На некои места видливоста во водата е речиси нула.