Италијанските гиганти веќе започнаа битка кој кого да потпише од сезонава одличните играчи на малиот и симпатичен Сасуоло.
Италијанските медиуми пишуваат дека на повидок е голема „тепачка“ меѓу клубовите од Серија А за потписот на најдобрите играчи на „Црно-зелените“ од Сасуоло, клуб кој очигледно за новата сезона ќе мора да составува нов тим.
Најжестока се очекува да биде борбата за младиот Џанлука Скамака бидејќи него го сакаат миланските градски ривали Интер и Милан. „Нераѕурите“ на големо се поврзуваат со враќање на Ромелу Лукаку, но реалноста е дека такво нешто е тешко остварливо.
Родум од Рим, Скамака има играно во младинските погони и на Лацио и на Рома, потоа беше во академијата на ПСВ, пред да дојде во младинскиот тим на Сасуоло, кој паметно го калеше праќајќи го на позајмици во Кремонезе, Зволе, Асколи и Џеноа, за сега да блесне во црнозелениот дрес и дури и да стане сениорски репрезентативец на 22 години (на 1 јануари наполни 23). Неговата цена е 30 милиони евра, но Сасуоло сигурно ќе инсистира на многу повеќе со оглед на тоа што има договор до лето 2025 година.
Вредност: 30 милиони евра
Договор до: јуни 2025
Најзагреан клуб: Интер и Милан
Потоа тука е неговиот 22-годишен соиграч од нападот, Џакомо Распадори, кој целата кариера досега ја мина во Сасуоло минувајќи ги сите младински категории. Сезонава блеска со 9 погодоци во Серија А, а него го пикираше Јувентус. Но, има еден проблем: Распадори е јавно деклариран навивач на Интер. Ваков проблем Јуве порано имаше со Доменико Берарди кој дури и беше откупен од торинскиот клуб, но постојано одбиваше да го облече белоцрниот дрес токму поради неговата љубов кон Интер, клубот кој, пак, никогаш не го посака.
Вредност: 28 милиони евра
Договор до: јуни 2024
Најзагреан клуб: Јувентус
Слично како Скамака, играчот од средниот ред Давиде Фратези е од Рим и младински фудбал играл за Рома и Лацио пред неговиот талент да го препознае Сасуоло. Сега Рома сака да го врати назад. Има 22 години, а четврта сезона по ред игра стандардно во сениорска конкуренција, но прва за Сасуоло и во Серија А, откако претходните три сезони беше позјамувам во Асколи, Емполи и Монца. Нема дебитирано за сениорите на Италија, но ништо чудно тоа наскоро да се промени иако конкуренцијата на неговата позиција е страшна со оглед на тоа што таму незаменливи се Барела, Верати и Жоржињо.
Вредност: 20 милиони евра
Договор до: јуни 2026
Најзагреан клуб: Рома
Поранешниот француски младински репрезентативец (сега има 24 години) втора сезона е во Ссауоло откако пристигна од редовите на Олимпик Марсеј. Игра како креативец во средината, а Маурицио Сари го пикираше како иден организатор на играта на Лацио. Бидејќи мајка му е Алжирка во иднина може да игра за ова африканска земја бидејќи засега нема место кај сениорите на Франција, По татко има потекло од Шпанија, па и тие се во игра. Тој е најефтин од оваа четворка бидејќи Лацио ќе треба да одвои околу 15 милиони евра за да го види на „Олимпико“.
Вредност: 14 милиони евра
Договор до: јуни 2025
Најзагреан клуб: Лацио