Американскиот претседател Доналд Трамп и неговиот руски колега Владимир Путин разговарале за време на лидерската вечера на самитот Г20 во Хамбург, за што досега немаше официјални информации, рече денеска претставник на Белата куќа.
Претходниот состанок на Трамп и Путин остана неразјаснет, а и по вториот Белата куќа не откри детали за тоа што разговарале двајцата лидери.
Информациите за вториот разговор ги објави Ијан Бремер, претседател на евроазиската консултантска група за политички ризици.
Првиот билатерален состанок се одржа на 7 јули, а Трамп подоцна рече дека Путин во тој разговор ги отфрлил тврдењата дека Москва се мешала во предизборната кампања во САД пред претседателските избори минатата година.
Американската разузнавачка служба верува дека Русија му помогнала на Трамп на претседателските избори минатата година, тврдења што Русија ги негира, а Трамп исто така.
Во вечерните часови и двајцата присуствуваа на вечерата за лидерите на Г20, а Путин седеше до американската прва дама Меланија Трамп. Американскиот претседател по вечерата му пријде на Путин, а информациите за тој разговор не беа објавени.
„Тоа не беше ‘вториот состанок на Трамп и Путин’, туку краток приватен муабет на крајот на вечерата. Инсинуациите дека Белата куќа се обидела ‘да го скрие вториот состанок’ се лажни, злонамерни и апсурдни“, рече изворот од Белата куќа.
Бремер рече дека Трамп во текот на вечерата му пришол на Путин и двајцата разговарале околу еден час „приватно и енергично“. Со нив бил и личниот преведувач на Путин.
Бремер рече дека отсуството на преведувачот на Трамп привлекло внимание кај останатите лидери бидејќи тоа било „кршење на националниот безбедносен протокол“.
Официјалниот претставник на Белата куќа рече дека лидерите и нивните сопружници на вечерата имале само по еден преведувач. Трамп седел покрај сопругата на јапонскиот премиер Шинзо Абе, а преведувачот на американскиот лидер зборувал јапонски.
„Кога Трамп разговараше со Путин двајцата лидери го користеа рускиот преведувач бидејќи американскиот не зборуваше руски“, додаде тој.
