Кога си заминуваше од Белата куќа, Доналд Трамп со себе зел писма од Барак Обама и севернокорејскиот лидер Ким Џонг Ун, па Националниот архив мораше да оди по нив во Флорида.
На крајот на мандатот, американските претседатели мора да ги предадат сите свои електронски пораки, писма и други работни документи до Националниот архив, кој е задолжен за нивно чување.
Но, напуштајќи го Вашингтон, републиканскиот милијардер одлучи да однесе неколку картонски кутии во неговата резиденција во Мар-а-Лаго, Флорида, соопшти денеска Националниот архив.
„Ми напиша прекрасни писма, тоа се одлични писма“
Кутиите, според The Washington Post, содржеле подароци од странски лидери, писмо оставено од неговиот претходник Барак Обама и неколку писма од севернокорејскиот лидер.
Доналд Трамп, првиот американски претседател кој се сретна со член на семејството Ким за време на неговиот мандат, одржуваше добро позната кореспонденција со севернокорејскиот лидер.
„Ми напиша прекрасни писма, тоа се одлични писма. Се заљубивме еден во друг“, им рече американскиот претседател на своите приврзаници во септември 2018 година.
Враќање на 15 кутии со документи
Во средината на јануари, Националниот архив „организираше враќање на 15 кутии со претседателски документи“ од резиденцијата на Трамп на Флорида во Вашингтон, се вели во соопштението на Архивот.
„Овие документи Белата куќа требаше да ги предаде во Архивот на крајот од администрацијата на Трамп, во јануари 2021 година“, се вели понатаму.
Но, некои документи уште не се доставени. Минатата недела Архивот откри дека поранешниот претседател сакал да кине дел од неговите работни документи, што исто така е во спротивност со законот од 1978 година.
Некои листови хартија предадени на Архивот „архиварите на Белата куќа ги лепеле со селотејп“, се додава. Останатите биле предадени такви какви што биле.