Европската Унија планира до октомври да развие и одобри за употреба три нови лекови против коронавирусот кои ќе ги третираат последиците од „продолжениот ковид“ коишто траат со недели и месеци по излекувањето на примарната инфекција, најавија од Европската Комисија.
Комесарката за здравство Стела Киријакидес вели дека засега во ЕУ авторизиран е само лекот Ремдесивир, а до крајот на годината бројот на нови лекови за третирање на последици од COVID-19 би можел да се искачи до пет.
„Клучно е покрај вакцините да ја забрзаме работата на производство на лекови против COVID-19, за да им помогнеме на луѓето кои имаат долгорочни последици од оваа болест. Целта е до октомври да развиеме и авторизираме три нови лекови против болеста и уште два до крајот на годината. Тоа е амбициозен чекор, но изводлив и неопходен“, вели Киријакидес.
Таа вели дека кампањата за вакцинација е забрзана во членките на ЕУ и напомнува дека одговор на COVID-19 не можат да бидат само вакцините. Мора да им се помогне на оние кои по инфекцијата страдаат од умор, пад на концентрацијата, нарушен сон, бидејќи очигледно коронавирусот ќе стане ендемски како што е случај со грипот.