Во Германија нема многу силни реакции откако неделникот Der Spiegel и јавниот сервис ZDF неодамна објавија голема истрага, според која сите траги од нападот на гасоводите Северен поток водат кон Украина. Волф Видман-Шмит од тимот истражувачки новинари дури има впечаток дека политичките лидери во Берлин ја избегнуваат темата.
„Се разбира, тие не можат само да одмавнат со раката за сериозно злосторство, но исто така не би можеле да престанат да ѝ помагаат на Украина во војната против Русија. Тоа не е опција“, вели Видман-Шмит за DW. „Значи, овде во Берлин сите помалку или повеќе го избегнуваат прашањето какви се последиците“, додава новинарот.
Детонациите на двата крака на Северниот поток во септември минатата година практично ја прекинаа секоја можност Германија директно да добива евтин руски гас. Ударот на гасоводот се случи во близина на данскиот остров Борнхолм во Балтичкото Море.
Според извештајот на Der Spiegel и ZDF, германските истражители имаат дебело досие во кое сите докази укажуваат на украински командоси. На пример, податоците како што се IP адресите покажуваат дека напаѓачите биле во Украина и пред и по нападот.
Уште порано беше познато дека диверзантите очигледно користеле јахта што ја изнајмиле користејќи фалсификувани пасоши. Тие отпловиле од Рошток. Според Der Spiegel, сега секоја трага води само до Украина. Инспекторите, меѓутоа, ја проверуваат и можноста дека се работи за руска операција изведена на начин да им се припише на Украинците.
„Се разбира дека и ние ги следиме таквите траги, но засега немаме докази за нив“, изјави државниот правобранител Ларс Оте за Der Spiegel. Тој додаде дека во моментот сè уште не може да каже дека пренасочувањето е „државно насочено од Украина“.
Но, малку е веројатно дека саботери се обични граѓани на Украина кои работеле сами. Како што пишува Der Spiegel од меѓународните разузнавачки кругови, идејата на Киев била да го прекине главниот извор на приход на Русија и „нејзиниот најважен инструмент за уцена“ на германската влада.
Додуша, тоа што трагите водат кон Украина не мора да значи дека ќе доведат до врвот на владата во Киев. „Дури би рекол дека експертите за разузнавање и безбедност сметаат дека е многу малку веројатно дека украинскиот претседател Зеленскиј знаел за акцијата“, вели новинарот Волф Видман-Шмит.
За Берлин е пикантно што информациите за нападот на Северен поток соодветствуваат токму на она што американската ЦИА и холандските тајни служби го предупредуваа околу три месеци пред нападот. Тоа не ги вознемири германските тајни служби бидејќи првичниот наводен рок за диверзија веќе беше поминат.
The Washington Post уште во јуни минатата година напиша дека ЦИА имала предупредувања од „европска тајна служба“. Во подоцнежните извештаи на медиумите се споменуваше Холандија, како и дека мозокот на акцијата бил украинскиот генерал Валериј Залужниј.
Како што сега откриваат Der Spiegel и ZDF, разузнавањето зборуваше и за планиран напад на Турски поток. Тој гасовод води до Турција, а потоа кон Србија и другите балкански земји. Нејасно е зошто не се спроведени плановите за таа диверзија.
Германската министерка за внатрешни работи Ненси Фезер верува дека на крајот ќе бидат покренати обвиненија против саботерите. „Се надевам дека државниот правобранител ќе најде доволно докази за да ги обвини сторителите“, изјави таа за Der Spiegel. „Ние мора да судиме такви злосторства“.
Сепак, како што пишува ZDF, Германија не може да спроведе истрага во Украина. „Федералната влада досега се воздржуваше од барање правна помош од Украина, бидејќи германските истражители потоа ќе треба да го споделат она што го знаат со Украинците“, се наведува во текстот, додавајќи: „Берлин не му верува на Киев“.
Тој пишува и дека канцеларот Олаф Шолц засега не зазема став и дека неговиот кабинет на новинарите само им кажува дека истрагата е во тек и дека треба да го почекаат исходот. „Но, како што според истражителите сѐ повеќе и повеќе индиции водат до Украина, така се зголемува притисокот да се заземе официјална позиција“, пишува ZDF, „дури и ако сторителите никогаш не завршат пред германскиот суд“.
До денес не е започната работа на евентуално поправка на Северен поток. Според експертите, доколку се чека предолго, цевките ќе кородираат поради солената вода и целиот цевковод ќе заврши во старо железо.
