Најмалку 12 луѓе загинаа, а 74 се примени во болница со повреди по пожарот што избувна завчеравечер во Grenfell Tower во Лондон. Медиумите и граѓани објавија снимки од инцидентот на кои е фатен ужасот што се одвиваше со часови.
Повеќе од 200 пожарникари со натчовечки напори се бореа со огнената стихија и храбро влегуваа во зградата и покрај пламените јазици и усвитените делови што паѓаа на сите страни.
На една од снимките се слушаат врисоци на жена која моли да ѝ ги спасат децата, а друго си го фрли бебето од 10. кат за да го спаси. Станарите и пожарникарите успеаја да го фатат во кебе. Меѓу загинатите има и дете кое зафатено од пламенот паднало преку прозорец.
„Имаше многу луѓе на терасите и на прозорците. Деца врискаа, тие звуци ќе ги памтам до крајот на животот. Еден човек направи импровизиран падобран и скокна. За среќа помина само со повреди“, вели Самира Ламрани, станарка во зградата.
Очевидци кажуваа дека луѓе скокале и ги фрлале децата за да се спасат. Некои се здобиле со повреди. Оние кои успеаја да побегнат на време од огнената стихија кажуваат како ги слушале молбените крици на соседите заглавени во пожарот. Сѐ било како во хорор филм.
Пожарот целосно ја уништи зградата. Медиумите објавија дека станарите претходно биле рпедупредени дека немаат соодветен противпожарен систем. Зградата е изградена во 1974 година и тогаш имало други правила за противпожарна безбедност. Главниот проблем бил што има само едни внатрешни скалила, а надворешни за во случај на пожар нема.
Експертите велат дека причината зошто пожарот се раширил толку брзо е лошо изработената и неквалитетна фасада на зградата што била дополнително ставена за „разубавување“ на старата зграда во редот на нови, модерни згради.
Во зградата живеат 125 семејства кои во пожарот изгубија сѐ.
