Ever Given, еден од најголемите товарни бродови со контејнери во светот, кој со денови го блокираше Суецкиот Канал, конечно се помести од „мртва точка“.
„Ever Given e успешно вратен во пловна положба утрово во 4:30 часот и во моментов е безбеден“, соопшти компанијата Inchcape Shipping на својот профил на Twitter.
Иако видеото од ослободувањето се шири „со брзина на светлината“ на социјалните мрежи, не е официјално соопштено кога еден од најпрометните канали во светот ќе биде „пуштен“ за сообраќај, откако поради блокадата од минатиот понеделник, заглавени чекаат речиси 400 бродови. Напорите за поместување на бродот траеја четири дена.
Радосните извици на екипажот „Се поместува! Се поместува!“ станаа хит на интернет.
Големиот товарен брод долг 400 метри и широк 59 метри, по ненадејниот налет на ветер што го наруши неговиот тек, се насука во каналот, на место помало од 300 метри.
Директорот на управата на Суецкиот Канал, Осама Раби, рече дека каналот губи приходи од 13-14 милиони долари секој ден и дека 369 пловни објекти чекаат да поминат низ каналот.
Невладината организација Animals International предупреди на потенцијална „трагедија“ што им се заканува на околу 130.000 животни.