Скопје, 8 јуни 2020 (МИА) – Петнаесет лица се лишени од слобода поради непочитување на забраната за движење на подрачјето на Полициската станица Бит Пазар во скопската населба Чаир.
Приведувањата биле извршени вчера во периодот од 19 до 20 часот на улиците „Методија Митевски“, „Емин Дураку“, „Вуковарска“, „Панче Неделковски“, „Лазо Трповски“ и „Никола Карев“, соопшти Министерството за внатрешни работи.
Оттаму истакнуваат дека продолжува со интензивни контроли на територијата на целата држава со цел санкционирање на непочитувањето на мерките за справување со COVID-19.
-Апелираме граѓаните да ги почитуваат овие мерки и заеднички да придонесеме во спречување на ширењето на коронавирусот, стои во соопштението од МВР.
До пет часот изутрина траеше 80-часовната забана за движење со цел спречување на ширењето на COVID-19, а која се однесуваше за граѓаните на сите општини во град Скопје, околните скопски општини Арачиново, Зелениково, Илинден, Петровец и Студеничани, како и во Куманово, Липково, Штип, Карбинци, Тетово, Боговиње, Брвеница, Теарце, Желино и Јегуновце.
На 511 лица им се издадени решенија за изолација, а 70 потпишале изјави за самоизолација во текот на изминатото деноноќие на територијата на државава.
По однос на мерката за неносење лична заштита на лице регистрирани се 318 прекршоци, соопштија денеска од Министерството за внатрешни работи.
Од страна на полициски службеници, изршени се контроли кај лица во изолација и самоизолација и не се евидентирани лица кои не ја почитувале мерката за изолација и самоизолација.
По однос на забраната за движење, во текот на изминатите 24 часа евидентирано е дека на ниво на целата држава 204 лица не ја почитувале забраната за движење, при што приведени/лишени од слобода се 180 лица, а за другите се земени податоци и ќе следуваат соодветни мерки.