Заокружени се и последните две недели што останаа од маратонското снимање на втората сезона од серијата „Carnival Row“ на Amazon.
Снимањето се одвиваше на неколку локации низ Република Чешка под строги протоколи за работа за заштита од коронавирусот.
Чешката филмска комисија соопшти дека „маратонското снимање“ што почна лани во ноември, а беше прекинато во март поради пандемијата и брзото ширење на COVID-19, е „финансиски најплодната странска продукција во земјата, откако Република Чешка почна да нуди субвенции за странски продукции“.
Главните улоги во нео-викторијанската фантази серија номинирана за награда Еми ги играат Орландо Блум и Кара Делевињ. Серијата е заеднички производ на Amazon Studios и Legendary Television.
„Снимањето на Carnival Row го донесе најголемиот финансиски прилив од странска продукција во Република Чешка досега, а екипата доби значителни олеснувања за снимањата на двете сезони“, рече Хелена Беждек Франкова, директорка на Чешкиот филмски фонд.
„Не заборавајте дека ова е директна финансиска инјекција во чешката економија, која потоа стигнува не само во филмскиот сектор, туку и во градежништвото, здравството, туризмот, транспортот...“, рече таа.