По историскиот момент во кој Конгресот на САД изгласа импичмент, односно отповикување на 45. Американски претседател Доналд Трамп, тој во негов стил и оваа одлука ја коментираше како да му оди во негова корист.
Иако формално е обвинет за злоупотреба на положбата и попречување на работата на Конгресот, тој зборувајќи на предизборен собир во Мичиген во текот на гласањето во Конгресот, случајот го претстави како пример за засилување на Републиканската партија.
Трамп, кој сака да освои втор претседателски мандат на изборите во ноември 2020 година демантираше дека прекршил закони и процесот го нарече „лов на вештерки“. Тој рече дека процесот на отповикување е „срамен жиг“ на демократите и на Ненси Пелоси, по цена на изборите во 2020 година.
Во еден од многубројните твитови пред гласањето Трамп порача: „Може ли да верувате дека денес ќе ме отповика радикалната левица, демократите кои ништо не работат, а не направив ништо погрешно! Страшно! Читајте ги транскриптите. Тоа не би смеело да му се случи друг пат на некој претседател. Молете се!“.
По гласањето рече дека Републиканците никогаш не биле така обединети како сега, додаде дека не е загрижен и дека всушност добро се забавува.
„Тројца демократи минаа на нашата страна, тоа е невидено“, нагласи Трамп. „Ги познавам сенаторите, тоа се прекрасни мажи и жени. Тие ја сакаат оваа земја, ќе ја направат вистинската работа“.
Белата куќа по гласањето порача дека се убедени во тоа дека Трамп ќе биде ослободен од Сенатот.
Ниту еден претседател во 243-годишната историја на САД не е сменет од функцијата во овој процес. За тоа е потребно двотретинско мнозинство во Сенатот кој има 100 членови, што значи дека најмалку 20 републиканци би морале да им се придружат на демократите во гласањето против Трамп.
