При засилената акциска контрола на територијата на државава за санкционирање на прекршоци што ги прават пешаците, Министерството за внатрешни работи во текот на вчерашниот ден во периодот од 8:00 до 12:00 часот санкционираше 142 пешака, од кои 118 за небезбедно преминување на улица надвор од пешачки премин.
Како што соопшти МВР, покрај ова, на 17 пешаци им се издадени покани за посетување на сообраќајна поука.
За време на контролата се регистрирани и 44 останати прекршоци.
– Засилените сообраќајни контроли продолжуваат и во наредните денови. Апелираме до граѓаните да ги почитуваат сообраќајните правила и прописи. Пешаците да го минуваат коловозот на обележан пешачки премин затоа што непочитувањето на сообраќајните правила ќе биде санкционирано. Сите заеднички, со почитување на правилата, мора да придонесеме за побезбедни сообраќајници, се наведува во соопштението на МВР.
