Претседателот на Владата на Република Македонија, Зоран Заев, по повод верскиот празник Богојавление – Водици, упати писмо со честитки до Г.Г. Стефан, Архиепископ на Македонската православна црква – Охридска архиепископија, и до сите православни верници во Република Македонија.
Во честитката на премиерот Заев до православните верници се истакнува дека овој празник потсетува на денот кога Исус Христос се крштеваше во светите води на реката Јордан, и дека сè може одново да се измие, очисти, обнови и повторно да се роди.
„Благородната порака на овој празник исполнува и со оптимизам и дека надежта и жедта за доброто, совршеното и убавото никогаш не згаснува“, стои во честитката.
Со овие пораки и со искрената верба во нив, да си посакаме подобра иднина, здравје, и со добра волја да се соочуваме со сите предизвици што ни претстојат на личен и на колективен план, наведува Заев во својата порака.
Нека ни е честит и вековит, големиот христијански празник Богојавление – Водици, се вели во крајот од писмото со честитки за празникот Богојавление – Водици на Претседателот на Владата на Република Македонија, до православните верници.
Инаку, премиерот Зоран Заев денеска за големиот христијански празник претстојува во Струга. По повод празникот тој ќе присуствува на чинот на спуштање на крстот и осветување на водите во реката Црн Дрим.