Најмалку 1.200 затвореници побегнаа од три индонезиски затвори откако земјотрес со јачина од 7,4 степени по Рихтеровата скала го погоди подрачјето во близина на островот Сулавеси.
Речиси 900 затвореници побегнаа од два затвори во градот Палу, откако просториите на казнено-поправните домови биле сериозно оштетени во земјотресот. Се срушиле неколку ѕидови, а потоа некои затвореници излегле покрај чуварите, а други низ главната врата.
“На почетокот сѐ беше во ред. Но, набрзо по потресот, почна да избива вода под зградата што предизвика паника кај затворениците и почнаа да бегаат. Сигурен сум дека побегнаа од страв дека им се загрозени животите. За нив сигурно тоа било прашање на живот или смрт“, изјави претставник на Министерството за правда кој додаде дека водата во тој затвор не била од цунамито.
Во затворот Донгал избувнал пожар, а оттаму моментално во бегство се 343 затвореници.
Од Министерството исто така рекоа дека затворениците барале да ги видат своите семејства по земјотресот и дека се налутиле откако барањата им биле одбиени.
Во земјотресот и цунамито што следеше по него, загинаа повеќе од 1.200 луѓе.
