Кошаркарите на МЗТ Скопје вечерва остварија триумф по две продолженија на тешкото гостување кај Рогашка со 90:83 во натпревар од 14-тото коло од регионалната АБА-2 лига.
Тимот од Аеродром заслужено дојде до победата во Словенија, бидејќи водеа во поголемиот дел од средбата. Домаќинот имаше по два шута за победа во последните напади во регуларниот дел и во првото продолжение, но одбраната на тимот на Ѓорѓи Кочов беше на висина на задачата.
Во второто продолжение скопскиот тим одигра одлично и со серија 9:2 дојде до предност од 83:76 која се покажа како недостижна за словенечкиот тим.
Со овој триумф, МЗТ останува на втората позиција на табелата во АБА-2 со скор 11-3, односно со само една победа помалку зад лидерот Борац од Чачак.
Српскиот интернационалец Ѓорѓе Милошевиќ запиша „дабл-дабл“ од 30 поени и 11 скока, а Дамјан Стојановски му помогна со 13 поени, 8 скока и 5 асистенции.
Следниот противник за тимот од Аеродром е токму лидерот Борац.