Популарниот бренд за спортска облека Adidas на својот Twitter профил објави колаж од 25 фотографии со голи гради, со цел да ја рекламира новата колекција спортски градници.
„Веруваме дека женските гради во сите облици и големини заслужуваат поддршка и удобност“, напишаа покрај фотографијата.
„Затоа нашата нова палета на спортски градници содржи 43 типа, па секој може да го најде вистинскиот за себе“, додаваат од Adidas.
„Спортскиот градник е најважното парче облека за вежбање за жените. Самодовербата и поддршката што ги дава може да има значително влијание врз перформансите и способноста за спортување. Фото колажот е дизајниран да покаже колку се различни градите, со различни форми и големини кои нагласуваат зошто приспособената поддршка е најважна“, изјавија од Adidas за CNN Business.
Жените и мажите на Twitter се вклучија во маркетиншкиот трик на Adidas со значително различни реакции.
Некои твитерџики рекоа дека повеќе би сакале да гледаат градници отколку гради. Други рекоа дека огласот е несоодветен или ги нашле неподготвени и збунети. Некои корисници рекоа дека е храбар потег и го пофалија Adidas за тоа.
„Ме потсетува на едно предавање за рекламирање на кое беше поставено прашањето: 'Како да привлечеш нечие внимание?' Им покажувате гола жена. Иако оваа реклама ги надминува сите граници, проблемот со оваа стратегија е што го засенува вистинскиот производ. Рекламата би можела да биде помалку шокантна доколку прикаже 43 жени кои всушност носат нови спортски градници“, заклучи Дејвид Пласек, експерт за маркетинг, пренесува CNN.
