Новата американска администрација соопшти дека ќе ги обнови односите со Палестинците, како и дека ќе им помогне на палестинските бегалци, што е пресврт во однос на политиката на администрацијата на Доналд Трамп, и клучен елемент на новата поддршка за заедничко решение за завршување на повеќедеценискиот конфликт меѓу Израелците и Палестинците.
Вршителот на должноста американски амбасадор во Обединетите нации, Ричард Милс, го најави новиот пристап на претседателот Џо Бајден на состанокот на Советот за безбедност на ОН и кажа дека новата администрација верува дека тоа и натаму е најдобриот начин за обезбедување на иднината на Израел како демократска и еврејска држава и легитимните аспирации на Палестинците за своја држава и безбеден и достоинствен живот.
– За овие цели да се постигнат нашата администрација ќе ги обнови односите со Палестинците, но и со Израелците, рече Милс, пренесуваат американските медиуми.
Тоа вклучува обнова на односите со палестинските лидери и палестинскиот народ, рече Милс, додавајќи дека Бајден е јасен дека има намера да ја обнови американската помош за поддршка на програмите за економски развој и хуманитарна помош за Палестинците.
Милс додаде дека Бајден ќе преземе чекори за рестартирање на дипломатските односи кои беа прекинати од претходната администрација.
– САД се надеваат дека полека ќе почнат да градат доверба на двете страни, да полека да се создадат услови во кои ќе може да се најде заедничко решение, рече Милс.
– Тоа значи да ги повикате двете страни да избегнуваат еднострани потези што го отежнуваат наоѓањето заедничко решение, како што е припојување територија, населување, уништување и плаќање на криминалци за извршување терористички акти, објасни Милс.
