Државниот универзитет во Мичиген (МСУ) се извини откако фотографија на Адолф Хитлер се појави на видео-бимот пред натпревар во американски фудбал.
Сликата на нацистичкиот лидер беше прикажана како дел од тривија квиз пред натпреварот на стадионот „Спартан“ во Источен Лансинг. Фотографијата, наводно, извадна од квиз на YouTube, се користела за да се илустрира прашање за родното место на фирерот.
„МСУ е свесен дека несоодветната содржина од извор од трета страна е прикажана на видео-бимот пред почетокот на фудбалскиот натпревар. Длабоко ни е жал за содржината што беше прикажана, бидејќи тоа не ги претставува нашите институционални вредности“, рече соработникот на атлетскиот директор на МСУ, Мет Ларсон, во изјава. Тој вети дека училиштето „ќе спроведе посилни процедури за скрининг и одобрување“.
Атлетскиот директор на училиштето, Алан Халер, подоцна објави дека вработениот бил суспендиран поради инцидентот. „Сликата прикажана пред саботниот натпревар не е репрезентативна за тоа кои сме и културата што ја отелотворуваме. Како и да е, ние мора да сме свесни за нашите неуспеси и да прифатиме одговорност“, рече Халер.
Случајот привлече особено внимание поради војната помеѓу Израел и Хамас, која предизвика бран на антисемитски и исламофобични инциденти на кампусите на американските колеџи.
Привремениот претседател на МСУ, Териза К. Вудруф, исто така се извини за пропустот, велејќи дека прикажаната слика „направи многумина од нашата заедница да се чувствуваат отуѓени и небезбедни“, напиша таа во писмото цитирано од CNN.
Креаторот на The Quiz Channel на YouTube, Флорис ван Палант, изјави за CNN дека не го овластил МСУ да го користи неговиот труд, но ја бранеше содржината на квизот. „Тривија прашањето прикажано на стадионот е легитимно и императив е да не се срамиме од потемните аспекти на историјата“, рече тој. Сепак, додаде дека не би го избрал токму тоа прашање за публика во живо на стадион.