Професорот по римско право и пратеник во македонското Собрание, Димитар Апасиев, објави дека тројца од судиите на Апелација што одлучија за 10 години да ја намалат казната на пијаниот возач што усмрти 11-годишно девојче во Велес, се избрани според Рамковниот договор.
„Тројца од судиите на Апелација кои ја донеле пресудата за преполовување на казната на убиецот на девојчето од Велес - се избрани по РАМКОВЕН.
Значи, корумпираните и правно неписмени кадри на ДУИ ни одлучуваат кој ќе иде у затвор, а кој ќе биде слободен! А Таче вика: 'Уште Бугарите у Устав и влагаме'.
p.s. Ако е и за Северџанистан - ДОСТА Е!“, објави лидерот на Левица на својот Facebook профил.
Синоќа голем шок и неверување во јавноста предизвика веста за намалувањето на казната на велешанецот Ангелчо Николов, кој возејќи пијан на пешачки премин пред Нова година ја прегази 11-годишната Магдалена Иванова и ја усмрти, по што избега од местото на несреќата без да ѝ укажи помош. Со повреди се имаше здобиено и нејзината мајка. Освен под дејство на алкохол, Николов возел и со прекумерна брзина.
Пресудата на Апелација е донесена по пет месеци од изрекувањето на првостепената бидејќи Николов издржуваше притвор поради опасност од бегство, кој му беше изречен сѐ до правосилност. Пресудата е правосилна, а ценети се сите олеснителни и отежителни околности. Казната е преиначена со образложение дека велешкиот суд не ги проценил доволно сите олеснителни околности за обвинетиот возач.
„Пресудата е шок за семејството и сол на рана. Образложението е релативно оскудно, Апелација се држи на тоа дека е неосудуван, признал вина и ја забрзал постапката, изразил каење и ветил дека нема да се повтори. Судот е должен да цени признание на вина но каење е предмет на проценка. На очиглед на сите иако вербално искажано, кај обвинетиот немаше никакво каење, никаква емоција. Неговото ветување дека нема да го повтори делото пак малку што му значи на семејството. Лесна и земја на Магдалена“, изјави адвокатот на семејството на прегазената 11-годишна Магдалена.
