Теорија на заговор што фрла сомнеж врз постоењето на цела една земја зема голем замав меѓу интернет корисниците.
Кога ќе се помириме со фактот дека има луѓе кои сметаат дека ако нешто прочитале или виделе на интернет, тогаш сигурно е точно, не треба да нѐ изненади теоријата на заговор дека Австралија не постои. Размислете убаво, знаците ни беа пред очи цело време: која е таа земја каде пајаците се поотровни од змиите и како воопшто сме поверувале дека постојат животни како кенгури?
Ова „откритие“ што зема замав на интернет во изминативе недели, оригинално е формулирано на Reddit во почетокот на 2017 година. Она што најмногу изненадува е фактот дека не е ни единствената географска теорија на заговор.
Една од најстарите теории датира од 1993 година, кога тогашните корисници на онлајн мрежата Usernet на шега го почнаа муабетот дека градот Билефелд во Вестфалија е измислен град во чие постоење нѐ убедиле ЦИА, Мосад, вонземјани или некоја комбинација од трите.
Високо на листата географски теории на заговор е Финска, земја што некои луѓе веруваат дека се наоѓа меѓу Русија и Шведска и дека наводно извојувала епска одбрана против советската инвазија пред Втората светска војна. Оваа теорија исто така се појави на Reddit, во 2015 година. Финска, објаснува редитерот со корисничко име Raregan, била само измислена креација создадена за да се направат квоти за рибарење за да се помогне извозот на суши кон Јапонија од Русија.
Лани летото, друг корисник на Reddit „укажа“ дека италијанскиот регион Молизе каде живеат околу 300.000 луѓе, не постои, најверојатно како интерна шега на Италијанците, а Бразилците веќе пет години имаат теорија дека северозападната покраина Акре не постои или во спротивно е земја заглавена во времето каде уште живеат диносауруси.
Да, ова се теории на заговор во кои веруваат повеќе од еден човек, оригиналниот заговорник.
Што ве тера да помислите: Колку слободно време имаат некои луѓе за да седнат и без апсолутно никаква академска поткованост да се сомневаат во физичкото постоење на географски поими? Што би рекле корисниците на Twitter – Вишок слободно време е опасна работа.