Некогаш најдобриот фудбалер на светот, барем според него самиот, почнува нова авантура откако потпиша со турскиот прволигаш Адана Демирспор.
Откако Марио Балотели не успеа да се пронајде ниту во Монца, од каде си замина после само 6 месеци, сега ќе се проба во турското првенство. Популарниот Супер Марио потпиша тригодишен договор со клубот од градот Адана во Јужна Турција.
„Денеска се оствари трансфер кој со златни букви ќе остане запишан во историјата на Адана Демирспор. Марио Балотели официјално потпиша тригодишен договор со нашиот тим. Супер Марио сега ќе постигнува голови во син дрес“, објави клубот.
Проблематичниот Балотели не може да се пронајде себеси откако си замина од Ница во 2019 година и цело време менува клубови за краток период. Неколку месеци во 2019 мина во Марсеј, потоа неполна сезона во Бреша, па полусезона во Монца во втората италијанска лига.
Балотели во август ќе полни 31 година и Адана Демирспор е веројатно последната шанса да си ја воскресне кариерата.
Неговиот нов клуб минатата сезона се натпреваруваше во втората турска лига каде како првопласиран се избори за пласман во елитата.
