Во Барселона започна голема чистка на вишокот играчи, а меѓу првите што ќе го напушти клубот ќе биде францускиот репрезентативец Самуел Умтити (28).
Французинот пристигна во Барселона летото 2016 година од Лион за 25 милиони евра, но по првите две солидни сезони на Камп Ноу, сè потоа падна во заборав бидејќи беше уништен од повреди.
Сето тоа време Умтити имаше фантастичен договор од околу 10 милиони евра годишно, па Барселона со години се обидуваше да го продаде.
Минатата сезона одигра само еден натпревар, а вкупно за шест години на Камп Ноу одигра само 133 натпревари во сите натпреварувања.
Челниците на Барселона сега решија да го раскинат договорот со Умтити иако тој има договор до крајот на јуни 2026 година (продолжен во јануари годинава) па Французинот ќе добие фер отпремнина и чисти документи.
Како слободен играч тој повторно е интересен за бројни клубови, а француските медиуми тврдат дека кариерата ќе ја продолжи во редовите на Рен.
Трансферот наводно е веќе договорен, а на негово доаѓање инсистирал тренерот на Рен, Бруно Џенесио бидејќи претходно работел со него во Лион и е запознаен со квалитетот на Французинот.