Навивачите на Барселона со големо нетрпение ја очекуваат следната недела, а според најавите на медиумите од Шпанија, клубот треба да заврши три големи работи кои се од големо значење за иднината на тимот.
Каталонски Mundo Deportivo тврди дека крилниот напаѓач на Барселона, Усман Дембеле се согласил да ја продолжи соработката со клубот откако прифатил 40 отсто послаба понуда за нов договор од онаа што ја одбил во декември минатата година.
Се наведува дека Дембеле треба да потпише двегодишен договор, а тренерот Чави инсистирал да остане, наведувајќи го како најважен играч во тимот.
Понатаму се наведува дека клубот се откажал од продажбата на Френки Де Јонг во Манчестер Јунајтед и дека овој холандски играч ќе остане во клубот и следната сезона, но и дека клубот е на прагот да потпише големо засилување за следната сезона.
Според најавите кои се појавија во последните неколку часа, клубот ќе плати 55 милиони евра плус 10 милиони евра бонуси за крилниот напаѓач на Лидс Рафиња и дека во тој поглед ќе ги извојува победата над Челси и Арсенал, кои исто така се бореа за потписот на овој агилен играч.
Бразилецот ги договори личните услови уште во март и остана само Барселона и Лидс да се договорат, но во целата приказна се вклучи и Челси и за овој играч испрати 60 милиони евра, што беше цифра која Лидс ја прифати.
Сепак, неговата желба да ја продолжи кариерата во Барселона на крајот секако ќе биде пресудна.
