Дејвид Бекам верува дека во негово време било многу полесно да се игра фудбал отколку што е денес. Далеку полесно му било и што покрај себе имал ментор како Сер Алекс Фергусон.
Легендарниот англиски фудбалер ја поддржа иницијативата „Heads Up“ на принцот Вилијам, во која се нагласува важноста на менталното здравје кај луѓето, вклучително и фудбалерите. Во соработка со Бекам и некои други фудбалери, тие ја направија декларацијата „Mentally Healthy Football“, која ќе им ја дадат на клубовите да ја потпишат.
Токму на презентацијата на декларацијата, Бекам зборуваше и за неговите искуства за време на кариера како активен играч.
„Кога бев фудбалер, влоговите беа големи, но ни близу како што се денес. Денес има многу повеќе фактори кои влијаат на фудбалерите, а тука е и огромниот товар од социјалните медиуми. Имав многу среќа што бев во клуб како Манчестер Јунајтед, кој имаше тренер како Алекс Фергусон. Кога го добив првиот црвен картон, првиот човек што ми се јави подоцна беше Фергусон. Тој ми рече да не се грижам затоа што клубот ќе се погрижи за мене“, рече Бекам.
Тој вели дека се чувствувал заштитено, иако понекогаш се прашувал што мислат фановите за него.
„Но, немаше социјални мрежи. Ако ги имаше, сигурно ќе беше уште потешко за нас“, рече Бекам.