Рускиот претседател Владимир Путин погрешно е информиран за војната во Украина и влијанието на западните санкции, објави Белата куќа, а со ова тврдење се согласни и европски функционери. Наведуваат дека неговите советници се плашат да му ја кажат вистината.
Путин има проблем, опкружен е со луѓе кои само му велат „да“, тврди европски дипломат.
„Имаме информации дека руската војска погрешно го информира Путин, што резултира во напнатост меѓу претседателот и неговите воени лидери“, вели Кејт Бедингфилд, директорка за комуникација во Белата куќа.
Додаде дека неговите советници се плашат да му кажат колку лошо напредува руската војска и колку можат западните санкции да ја оштетат руската економија.
Висок европски дипломат изјави дека американската процена е во склад до европското размислување.
„Путин мисли дека работите одат подобро отколку што навистина се случува. Тоа е голем проблем кога сте опкружени со мажи кои велат само „да“ или седите со нив на крајот на многу долга маса“, изјави за Reuters висок дипломат од ЕУ.
На руските војници им е кажано дека учествуваат во воена вежба пред инвазијата на Украина, но морале да потпишат документ со кој се прошируваат нивните должности, изјавија двајца европски дипломати.
„Беа лошо заведени, лошо облечени, а потоа стигнаа во Украина каде беа дочекани од Украинки кои изгледаа како нивните баби и им викаа да си одат дома“, вели неименуваниот дипломат.
„Засега нема знаци дека ситуацијата би можела да поттикне бунт внатре во руската војска, но ситуацијата е непредвидлива и западните сили се надеваат дека овие несреќни луѓе ќе проговорат“, вели висок европски дипломат за Reuters.
