Карим Бензема игра блескаво оваа сезона и е главен кандидат за Златната топка, а францускиот напаѓач во интервју за УЕФА ја откри тајната на „паненката“ против Манчестер Сити.
Тоа е гол што би можело да ја одбележи оваа сезона во Лигата на шампионите, бидејќи „Кралевите“ беа „на тенок мраз“, а Бензема беше многу храбар при резултат 4:2 за „Граѓаните“ и приреди вистинско ремек дело.
„Се трудев долго време и го чекав вистинскиот момент, на ваков натпревар со голем притисок. На овој начин притисокот исчезна. Секако, имаше притисок, тоа е нормално. Ама тоа е позитивен притисок, еден вид оптоварување што дозволува вакви работи. Тоа е мое мислење, не знам за другите. Ја спуштив топката и знаев дека ќе го направам тоа. Не мислев ништо друго, мислев само на тоа“, изјави Бензема.
На фотографиите за време на изведувањето пенали се гледа дека Бензема го гледа судијата до неговиот свиреж.
„Секогаш го правам тоа. Не само овојпат. Ако не го направам тоа, тогаш не можам да гледам или да слушам јасно. Толку сум фокусиран што веќе не можам да слушам ништо во тој момент. Само сум фокусиран на мојот шут, со надеж дека топката ќе влезе“, откри напаѓачот на Реал Мадрид.
Уште еден детаљ привлече внимание. Бензема со поглед ја следеше топката додека таа не влезе во мрежата. Французинот тврди дека не е страв и вознемиреност додека очекува дали топката ќе влезе во голот.
„Не, не беше страв. Го држев погледот на топката затоа што беше добар шут. Затоа ја гледав, не затоа што мислев дека ќе ја погоди гредата, туку затоа што беше убав шут. Само гледав и чекав пред да го прославам голот “, рече Бензема.
