Македонскиот фудбалски репрезентативец конечно најде нов клуб откако цело лето го мина барајќи нова средина по напуштањето на молдавски Шериф.
Бобан Николов минатата сезона настапуваше за Шериф, но го напушти овој клуб уште во јуни. Оттогаш беше во потрага по нов клуб, го загуби местото во репрезентацијата поради таквата ситуација, а денеска конечно го реши клупскиот статус откако романскиот гигант објави за соработката. Иако летниот преоден рок заврши, како слободен играч Николов имаше право да потпише договор и надвор од преодниот рок.
Клубот ФЦБС, како што сега гласи официјалното име на Стеауа од Букурешт откако сопственикот Џеорџе Бекали во 2017 година го загуби спорот со романската армија за користење на славното име Стеауа, објави дека 28-годишниот македонски играч за врска веќе го потпишал договорот и го одработил првиот тренинг под команда на стручниот штаб предводен од Николае Дика.
„Нашиот клуб му посакува добредојде и нека има што повеќе успеси во црвено-синиот дрес!“, порача клубот на официјалната веб-страница.
Родум од Штип, Николов кариерата ја почна во младинскиот погон на Брегалница, а уште како тинејџер замина во Академиа Хаџи, клубот на романската легенда Георге Хаџи. Играше уште и за романски Вииторул, скопски Вардар, унгарски МОЛ Фехервар и калчолигашот Лече (тогаш во Серија Би). Романскиот јазик одлично го владее. За репрезентацијата на Македонија има 46 настапи и 4 постигнати голови.
