Британскиот национален авиопревозник British Airways откажа повеќе од 10.000 летови од својот зимски распоред, отстранувајќи од продажба речиси два милиона места.
Откажувањето на летовите на кратки релации, од крајот на октомври до крајот на март, има за цел да се минимизираат прекините во сообраќајот во текот на зимата.
Авиокомпанијата, исто така, ги откажува летовите на долги релации до Кина и Бангкок, повикувајќи се на ограничувања за COVID-19. Портпаролот на компанијата истакна дека продолжувањето на летовите за Хонгконг ќе биде одложено до декември, кога ќе има еден лет дневно.
British Airways од почетокот на летото откажа дури 38.000 летови. Откажаните зимски летови се еднакви на речиси една десеттина од планираните летови. Одлуката е резултат на потресите во секторот на воздушниот транспорт, објави весникот The Times.
Европските авиокомпании трпат рекордни доцнења во европскиот воздушен простор поради недостиг на персонал, големи отсуства поради болести и метеж предизвикан од затворањето на воздушниот простор над Русија и Украина.