Овие домашни лепчиња без квасец се одличен предлог кога, од различни причини, дома ќе останете без леб. Се подготвуваат за 5 минути, додека за печење се потребни 20 минути.
Доволно е да ги измешате сите состојки, формирате лепчиња и да ги ставите на печење. Лепчињата може да ги искористите за сендвичи за појадок или вечера, по ваш избор.
Потребни состојки:
- 450 г брашно
- лажичка сол
- лажичка шеќер
- лажичка сода бикарбона
- 350 г грчки јогурт (да потстои на собна температура)
За премачкување:
- јајце
- сусам
Начин на подготовка:
Ставете ги сувите состојки во сад, измешајте додека не се соединат. Потоа додадете го јогуртот и замесете тесто. Кога ќе биде формирано, кинете од тестото и формирајте лепчиња. Ставете ги на плех обложен со хартија за печење.
Со нож исечете ги лепчињата. Горната површина премачкајте ја со изматено јајце и посипете сусам.
Ставете лепчињата да се печат на рерна загреана на 200 степени и печете 20 минути.
По печењето оставете да се оладат на решетка.