Следејќи го календарот, Фортуна - Падерборн треба да биде натпреварот кој ќе го скрши мразот, но се појави проблем со ТВ-правата кој треба да се реши во најбрз можен рок бидејќи во спротивно натпреварот освен што ќе биде со празни трибини, нема да биде достапен и на малите екрани.
Бундеслигата е во брзање. Германија сака да се покаже како локомотивата која ќе ја поведе Европа назад во фудбалскиот свет. Ангела Меркел даде зелено светло, а Лигата синоќа соопшти дека наредниот петок, на 15 мај, ќе се реотвори сезоната.
Неколку клубови побараа стартот да биде на 22 мај бидејќи имаат потреба од уште некоја недела плус за тренинзи со оглед на тоа што некои дури од понеделникот почнаа со тренинзи, но не групни. Сепак, време нема, бидејќи планот е да се заврши сезоната до 30 јуни. Лигата денес ќе го комплетира календарот на кој треба да се додадат натпреварите од ДФБ купот, двете полуфиналиња и финалето.
Проблем сега се ТВ-правата кои за емитување во Германија ги имаат Sky Deutschland и Eurosport, но овој вториот не ја плати последната рата. Eurosport, всушност, натпреварите не ги емитува во Германија, туку во странство, но своите права за домашниот пазар му ги препродаде на DAZN. Сега проблемот е што DAZN има платено, а не може да емитува бидејќи Eurosport го нема доисплатено својот дел. Eurosport не ја плати ратата поради финансиски проблеми на Discovery, која го има под своја капа Eurosport.
DAZN ги има правата токму за натпреварите кои се играат во петок вечер. Поради овој проблем, може да се случи покрај тоа што ќе се игра пред празни трибини, реотворањето на сезоната да го нема и на тв. Sky Deutschland нема права да пренесува во петок вечер.
Доколку овој проблем не се среди, Падерборн и Фортуна ќе играат во тотален мрак.