Чадот од пожарите во Сибир, за првпат во историјата, стигна до Северен Пол. Пожарите во Сибир зачестија во последниве години, а екологистите го поврзуваат со климатските промени и недоволно финансираната шумарска служба, пренесе BBC.
Климатските експерти на ОН вчера објавија извештај кој покажува дека глобалното затоплување се случува побрзо од очекуваното и дека човештвото е речиси целосно виновно за тоа.
Еден од најтешко погодените региони на Сибир оваа година е Јакутија, најголемиот и најстудениот регион во Русија, што се соочи со рекордно високи температури и суша.
Руската хидрометеоролошка служба, Росгидромет, вчера соопшти дека ситуацијата во регионот „продолжува да се влошува“ и дека горат пожари во регионот, при што се опфатени области што се оддалечени и тешко пристапни.
НАСА објави дека нејзините сателитски снимки покажуваат чад од огнот, што патува „повеќе од 3.000 километри, од Јакутија до Северен Пол“.
Според податоците на руските власти, годинашните пожари опустошиле повеќе од 14 милиони хектари. Шефот на руската програма за шумарство на Гринпис, Алексеј Јарошенко, го поврза ширењето на огнот со последиците од климатските промени и „континуираното влошување на управувањето со државните шуми“.
